首映肉搏戰熱融冰河 超雲、超蓮雙打擊沉o靚模

動畫《冰河世紀3大威龍駕到》前晚在圓方舉行首映,賭王三房女兒、青春無敵的超雲和超蓮低胸上陣,官恩娜則大露背,更有小龍女陳玉蓮出山,三代名人明星共冶一爐,群揪在場人氣勁升的o靚模胡心諾(Rainbow)和鍾蕙芝(Lavina)。一輪混戰後,終由最省鏡的何家淑女勝出。


o靚模新勢力強勢崛起,17歲的胡心諾和同齡的老翻阿Sa周凱盈(Monique)、擁34E大胸的21歲o靚模鍾蕙芝帶同師妹Yuki,前晚齊穿短裙熱褲晒腿出擊,現身圓方出席動畫《冰河世紀3大威龍駕到》(Ice Age:Dawn of the Dinosaurs)首映,搶鏡程度猶勝有份配音、穿大露背裝的官恩娜及稀客陳玉蓮。

自信索過o靚模
本來佔盡上風的o靚模,其後風頭卻被兩位何家淑女蓋過。賭王三房的20歲女兒超雲、18歲龍鳳胎超蓮和猷啟到場,雖然早前三姨太陳婉珍曾指女兒衣着太性感,但是夜超雲和超蓮的低胸打扮卻勁搶鏡,超雲遇見o靚模時更投以奇異目光。 問超雲是否認識o靚模時?她卻掩嘴不屑說:「吓?唔知呀,乜嘢模呀?」此時她見o靚模正在拍照,又笑說:「我都幾似佢哋。」超雲覺得靚是各花入各眼,但問她是否自己較索?她即自信地說:「梗係啦。」不過她自嫌太肥,最想減大髀。至於超蓮就匆匆入戲院,記者指她衣着性感,她卻說:「又性感?我已經唔着短褲。」 官恩娜前晚有備而戰,出動大露背戰衣,更邀得陳玉蓮撐場。久違的蓮妹對於與o靚模同場笑說:「最緊要靚,青春最代表到靚嘅時間,冇嘢唔接受,自己年紀大就要諗吓接唔接受到自己啫。」蓮妹是否怕老?她不諱言:「個個都怕老㗎啦。」

蓮妹唔愛化妝
蓮妹強調不打botox,因她有一套自然護理法,「平時唔化妝,自然就唔使用,同埋冇食療。」女星視護膚品為回春靈丹,49歲的蓮妹卻唱反調:「家啲護膚品化妝品,叫做控油,控油塊面咪乾,乾咪叫你保濕囉。油唔使吸,有少少喺臉上係正常。」 官恩娜以大露背鬥o靚模,她卻說:「唔擔心被搶風頭,唔係鬥靚,最緊要大家欣賞。」提到o靚模令競爭白熱化,31歲的官恩娜自信地說:「我老啲,百花齊放,唔同路線唔怕比較。」 採訪:魯萍 攝影:葉君海、黃偉雄


何超雲前晚以一身性感打扮出席首映禮,大勝o靚模。


官恩娜(右)邀得小龍女陳玉蓮出山撐場,惜仍被o靚模及何家淑女搶晒鏡。


超蓮抗母令,繼續以低胸裝示人。


左起:Monique、Rainbow和Lavina三o靚模,前晚帶小師妹Yuki睇首映。


刊於 20090702 蘋果日報