探熱針

見好反價 蔡楓華復出快斬廿萬

2011年03月30日

廿五年前一句「一剎那光輝……」,令蔡楓華( Ken)萬劫不復,去年尾重遇好友盧敏儀( Money),在她及夫婿孫敬安協助下重出江湖,九展復出個唱反應熱烈,一場變三場,阿 Ken更由最初願意不收分文,到後來開大口兩度要求加薪 100%過廿萬。講到錢,老友都無情講!

唔想加場


一連三場《全心支持蔡楓華演唱會》於本週一晚結束,門票賣個滿堂紅,尾場當晚,阿 Ken high爆,不停「回帶」說要「殺入紅館」。去到慶功宴,又忽然投訴辛苦,聲稱原本不想加開第三場,但為報好友盧敏儀夫婦相助之情才答應,一副不在乎的樣子,還自稱對 Money夫婦有情有義。
盧敏儀老公孫敬安聽見記者覆述蔡楓華的說法,忍唔住說:「係我哋兩夫婦對他有情有義至啱呀!」之後再爆阿 Ken兩度坐地起價,要求加歌酬。


盧敏儀刻意攬住患有眼疾的蔡楓華,令記者無法影到他除眼鏡休息的真面目。


蔡楓華出入下榻的麗東酒店,由盧敏儀夫婦駕車接載。

坐地起價


「一開始冇人肯做主辦,更加冇贊助,當時阿 Ken擔心支出大蝕得多,願意唔收錢唱,因為反應幾好加多場,佢認為要計番錢,加場即係有錢賺,所以我哋都答應佢要求,後來再加第三場,佢要求加薪 50%,我哋照應承晒簽晒約。」孫敬安說。
當初眾志成城救楓華,但據知情人士透露,蔡楓華得知主辦商有錢賺,態度開始有變,提出兩場要收十多萬歌酬,到門票開售火速爆滿再加開第三場,他立即表態,要求第三場歌酬再提高 50%,由最初唔收錢,到有超過廿萬落袋。


十多年前曾做蔡楓華個唱嘉賓,阿倫十分有心,今次自動請纓再做,人間有情。


在慶功宴上肉緊拖實睇完騷去埋慶功宴的陳玉蓮(中)及洪欣。


無綫前高層何麗全(中)、陳家倫(左)及重新掌權的陳志雲捧場,高層監場,蔡楓華緊張到在台上仆倒。



墊支出糧


「我哋其實出咗成百萬製作費未收番,票房要四月先收番二百幾(萬),不過我哋已經俾晒錢(歌酬)阿 Ken,由佢自己處理。」在尾場曾語重心長對阿 Ken表示:「呢啲錢幫你儲起,你要好好利用。」的盧敏儀,為免外界以為今次合作有錢銀爭拗,急住插口,不斷重複雙方在錢銀方面無問題,合作愉快,截住老公,處處維護蔡
楓華。
至於蔡楓華希望在紅館舉行個唱,孫敬安表示大名娛樂已為他入紙申請場地,但未知自己到時會否加入主辦行列。此外,他說未來仍會與蔡楓華合作,新加坡、美加、澳門及廣州等地,均有主辦商洽談舉行蔡楓華演唱會。除了巡迴計劃,還有推出演唱會 DVD,一條龍式賺錢套餐,相信可再為蔡楓華賺一筆。


剛開完騷的 Chilam現身支持,盧敏儀握手道謝,蔡楓華在台上又借題發揮:「見到 Chilam好羨慕佢開紅館!」成晚係咁回帶講「紅館」。


個唱特設多個握手時段,蔡楓華落台跟大班六、七十後歌迷握手,氣氛熱烈。

楓語錄


蔡楓華開騷,每唱幾首歌便與台下歌迷傾偈,偉論一時一樣,講極唔完,充分反映自負又自卑的兩面性格。

亢奮


●我假假哋係八十年代天王巨星
●我要做番天王巨星,明白未?
●呢個唔係同情、乞食演唱會,係支持蔡楓華,我唔需要人同情同憐憫,我仲有骨氣。
●如果歌迷未嫁,呢個 available,我係好好嘅男仔。
●我一生人人窮志不窮
●不到紅館,誓不為人。
●蔡楓華再喺香港開,下一次一定係紅館,其他場俾幾千萬我都唔做,人哋唔開我自己開。問歌迷一人借一萬蚊,遲啲還。

自卑


●過去十幾年,我生不如死,苦不堪言。
●每次媽咪送嘢食嚟我屋企,我睇住佢背影,好傷心,佢講過「男兒流血不流淚」。
●喺 Cash活動見到好多舊朋友想同佢哋握手,但我自卑,怕人哋唔想同我握。
●現場有人大嗌靚仔,蔡楓華說:靚仔唔輪到我,我好自卑 o架,仲話我靚仔?

撰文、攝影:娛樂組

壹傳媒互動有限公司 版權所有 不得轉載



「一人一支水◆送水到日本」籌款行動
商業一台『左右大局』主持及聽眾一同發起



FullMagPH View (N1.)(next.) 3.1.1