近期人氣急升的蔡楓華，個唱後即被邀到中文大學獻唱，現場氣氛熱烈。志不在錢的蔡楓華表示：「好多年冇入過學校，我自己當年都係大學生，好有回憶。」
娛一叮
明年 4月紅館開個唱 蔡楓華：我要賺錢養阿媽
2011年04月01日蔡楓華於九展舉行的三場《全心支持蔡楓華演唱會》，終於在周一（ 29日）順利完成。雖然近日有傳蔡楓華與演唱會搞手、盧敏兒老公孫敬安為錢反目，但蔡楓華向本刊聲言絕無其事，還鐵定與孫敬安和林建名再度合作，入紙申請明年 4月紅館個唱檔期，一圓多年夢想。
蔡楓華在人生低潮時幸得母親經濟支持，對他不離不棄，他誓言：「我要賺多啲錢養阿媽！」
51歲的蔡楓華（ Ken），沉寂十年，今年終於吐氣揚眉，在好友盧敏儀孫敬安夫婦，及大名娛樂老闆林建名幫助下，令他個唱夢成真。
3月 30日中大出騷受歡迎
當今的大學生雖然同蔡楓華年代差一截，不過學生們都相當熱情，爭相與蔡楓華握手，還有女學生 fans舉牌支持，令人意想不到。
個唱直擊 有靚衫
演唱會上蔡楓華總共換上 5套衫，全為名服裝師吳寶玲 Bo Bo姐設計， Ken仲話：「我唔靚仔，好在有靚衫搭夠！」
有料爆
盧敏儀和蔡楓華在台上真情對話， Ken更直言 85年的一句「剎那光輝不是永恆」被高層照肺，更迫他講對唔住。
有女陪
蔡楓華的快歌不多，但仍然請來 dancer伴舞，令觀眾睇落冇咁悶，唔使全晚得一支公！
大名娛樂老闆林建名和孫敬安將再次出錢出力，幫蔡楓華於明年舉辦紅館個唱，可喜可賀。
林建名出錢闖紅館
翻身成功，蔡楓華即心急闖紅館。上周六（ 26日）蔡楓華在演唱會當住三千名觀眾，問林建名會否科水幫自己搞紅館個唱，鏡頭影住林生，他即點頭答應。周一（ 28日）晚，林建名出席演唱會慶功宴時，本刊記者追問他是否真的出錢支持，他認真說：「我會幫佢搞紅館演唱會，現階段準備緊，幾時有期咪幾時開！」
除了幫蔡楓華搞紅館個唱，林建名更有意簽蔡楓華成為旗下歌手，他說：「我係想簽佢，亦初步同佢傾過，要遲啲再傾。」
至於演唱會另一主辦人孫敬安，近日被指因蔡楓華獅子開大口、坐地起價而與對方反目。但周三晚（ 30日），孫敬安向本刊澄清絕冇此事：「我哋絕對冇不和。如果有，我唔會慶功同佢慶到凌晨 4點幾，仲要醉晒都送佢返酒店。我同老婆一心想幫佢，想佢有好嘅將來。價錢係一早傾好， Ken初頭話唔收錢係怕反應唔好，後來場場爆晒，佢收幾十萬歌酬亦好合理。」
蔡楓華亦對本刊記者說：「睇到呢啲報道真係好唔開心，因為唔係真嘅。我同 Money、孫生識咗咁多年，唔想因為呢啲新聞而令我哋關係變差，我好珍惜呢段友誼。」他更說孫敬安已答應替他搞紅館演唱會。孫敬安說：「今年 11月本來有幾日期，但應該爭唔到。依家要去到明年 4月，總之我同林生都會幫佢搞，我對佢開兩場紅館好有信心。」
出場前家人鼓勵
有林建名和孫敬安支持，蔡楓華事業將可進一步翻身，因此他會暫緩做青光眼手術，爭取搵銀機會，報答母親。他說：「喺我人生低潮時，媽咪一路經濟上支持我，佢知我鍾意食魚，就成日煲魚湯我飲，日日送飯，所以嚟緊我要賺多啲錢養番媽咪。」
據知蔡母為支持愛子，特意在第二場演唱會，帶同蔡楓華大哥及大嫂入後台為他打氣，打破兩兄弟多年來隔膜。知情人士說：「 Ken嘅媽咪自己走去排隊買飛，所以第一場根本冇人知佢嚟咗。第二場佢仲同埋 Ken嘅大哥同大嫂入後台。佢大嫂拎咗個生果籃送俾佢，哥哥就拍一拍佢手臂，叫佢俾心機唱！咪睇 Ken平時咁硬淨，屋企人走咗，佢就行埋一邊喊，我哋見到都好感動！」蔡楓華多年來幾經波折，如今一鋪反彈，親情又返晒嚟，總算苦盡甘來。
陳志雲都有捧場，唔知係咪想簽佢做藝員呢？
剛於周日（ 27日）至完成紅館個唱的張智霖，周一（ 28日）即捧蔡楓華場，好有心喎！
慶功 high爆
啜服裝師
蔡楓華在慶功宴上飲咗少少酒，即 high爆滿場飛，仲啜爆幫佢設計靚衫嘅服裝師 Bo Bo姐。
攬小龍女
前往捧場的小龍女陳玉蓮和洪欣被邀請到慶功宴，蔡楓華見到小龍女後更高興得搭膊頭合照，更露出難得一見的笑容。
採訪、撰文：蘇詠詩
攝影：葉兆康、鄭家駿、邢華
壹傳媒互動有限公司 版權所有 不得轉載
「一人一支水◆送水到日本」籌款行動
商業一台『左右大局』主持及聽眾一同發起
FullMagPH View (N1.)(sudden.) 3.1.1
