同你吟一吟 琴姐 PK見紅

上個禮拜五晚（三月九日），歷年《歡樂今宵》嘅台前幕後同事，响尖東一間酒樓筵開十二席，舉行「EYT好友會聯歡晚宴」聚舊。

已經八十歲嘅琴姐李香琴都係座上客之一，不過一嚟到酒樓，無端端成個人跪咗落地，同佢一齊到嘅余慕蓮當堂嚇一嚇，周圍嘅人亦即刻衝埋去扶起琴姐。 忽然腳軟，琴姐話冇有怕：「我嚟到掛住望歡樂今宵個牌冇留意有一級，所以仆親，不過冇事嘅，見到老朋友開心嘛！」話就咁話，其實琴姐右腳仆到見血，佢仲顧住做咗訪問，之後至貼膠布止血。 琴姐開心到唔識痛，現場班《歡樂今宵》老臣子同樣happy，尤其係有傳非戲劇組節目總監余詠珊有意安排《歡樂今宵》復活，個個都舉手贊成，曾華倩、江欣燕、戚美珍仲話一定會幫手，最好係做現場直播。 而家唔少阿哥阿姐都响《歡樂今宵》木人行大，再復活，都要靠班舊人撐場，都好唏噓。 ####

口話唔覺痛，其實見晒紅，琴姐都八十歲人，真係要小心啲！

琴姐睇唔到地下有一級樓梯，搞到pk，負責响1967年製作《歡樂今宵》嘅蔡和平，即時上前慰問琴姐。

陳玉蓮、戚美珍、曾華倩、江欣燕，當年呢班花旦都有份做《歡樂今宵》，換轉今時今日，徐子珊楊怡陳法拉肯先奇！

當年有份搞《歡樂今宵》嘅吳雨，都有現身聯歡會，仲話如果無綫搵佢，唔介意過料幫手安排《歡樂今宵》復活。旁為麥景婷、廖安麗、鄧英敏。

梅小惠嚟到第一件事擺低入場費，每人夾三百五十蚊，有得食又有得聚舊，啲菜都唔太失禮。