蓮妹一直都是愛恨分明，近年更是我行我素，活得瀟灑。攝影：林德雄
蓮妹一直都是愛恨分明，近年更是我行我素，活得瀟灑。攝影：林德雄
問世間，情是何物，直教生死相許。
天南地北雙飛客，老翅幾回寒暑。
歡樂趣，離別苦，就中更有癡兒女。
君應有語，渺萬里層雲，千山暮雪，隻影為誰去？
元好問《摸魚兒》
2012年電視機入面播着片尾曲「情若真，不必驚怕聚散，變化轉瞬也應見慣……」畫面是朱咪咪和鍾景輝情深對望，畫面觸動視覺神經，同時勾起我們的集體回憶。回到1983年的《神鵰俠侶》，飾演楊過和小龍女的劉德華和陳玉蓮。過兒已經成家立室，還誕下小龍女；姑姑形單隻影，全年無休致力行善，出入深山尋找愛的呼喚，活得自在逍遙。撰文：楊潔雯
陳玉蓮來無影，去無蹤，樂做《神鵰俠侶》的小龍女，過兒雖已為人夫，心中卻仍念着姑姑，早前劉德華在節目《最佳男主角》中透露如果無女朋友，陳玉蓮會是他的女朋友：「佢真係好小龍女，真係姑姑，是非黑白分得好清楚，嗰份氣質同感覺，到家都覺得好靚，我心目中嘅小龍女得佢一個。」由始至終姑姑在過兒心中，從來無變，但是礙於過兒已經有家室，蓮妹有點不好意思說：「華哥係唔想講太多太太所以咁講，如果係咁，我就認住先喇！」
（左起）楊盼盼、黃杏秀及蓮妹當年的古裝扮相，各有氣質。
蓮妹在08年出山，與劉松仁合作拍《原來愛上賊》。
賈思樂與蓮妹當年曾傳拍拖，二人到現在仍是好友。
蓮妹認為《神鵰俠侶》對她和劉德華同樣影響深遠，她說：「事實《獵鷹》之後，《神鵰俠侶》係令華哥更出名，至於我，其實開心，好多人仲因為小龍女記得我，全世界有華人嘅地方都會知邊個係小龍女，有啲藝人可能做一世都冇代表作。但係咁樣亦唔會影響到我要停留喺小龍女嘅階段，但係咪要搵多一套代表作，我覺得又唔需要囉！」
蓮妹遊走大江南北，已習慣跟一班同道中人過着群體生活，蓮妹單身，但並不寂寞，她不想拍拖、結婚，甚至生仔，她說：「我覺得唔需要，其實我哋有好多人一齊修行，已經係『同修』，已經係一個情，大家覺得人係需要一個伴，咁點解一定要係一個呢？」
蓮妹一邊行善，一邊修行，經常深入偏遠山區，幫助一些貧窮年幼的女孩，教導和培育她們：「家我已經收養了六個女仔，要花好多時間和心機教佢哋，因為佢哋係住偏遠山區，冇受過教育，好似一張白紙咁，要教佢哋知識文化，仲會照顧埋佢哋屋企人，寄錢養埋佢屋企，真係好大責任。」蓮妹不屬於任何一個慈善機構或者組織，「逍遙一族」正好形容她和一班為慈善出錢出力又不記名的善心人，她說：「花好多時間去山區搵合適嘅人，目標？就係培養佢哋第日去做慈善，所以幫呢班小朋友，係冇回報。」
蓮妹出入竹林深處，繼《原來愛上賊》之後，小龍女第二度出關，接拍無綫重頭劇《名媛望族》，習慣隱世生活的她永不言休，她說：「冇人知道第日發生乜事，講嘢唔好咁肯定，所以我唔會話退休，不過好多時，我去咗偏遠地方，好多人都以為我失蹤，其實只要啱時間，我都會拍戲同出席活動！」
初出道的蓮妹曾演過蠱惑女的角色。
姑姑與過兒是香港人的集體回憶，無可代替。
講到尾，要小龍女出關，時間、人物、地點，甚至題材都很重要，今時今日的蓮妹，不要再做冷若冰霜的小龍女，她盼望拍一套令大家開心的喜劇：「真係好想拍喜劇，同邊個做都冇所謂，如果個角色係啱，再同華仔合作都可以。」華仔透露想回無綫拍偶像劇，蓮妹聽到哈哈大笑，然後問：「咁佢做乜呀？其實佢想拍偶像劇，心態都幾好，好似我想拍喜劇，都係同一個道理，大家都想輕鬆，拍一啲有活力嘅戲，帶一啲正能量畀大家。」相隔多年，小龍女和楊過仍心靈相通，正！